#Day-2
話說今日全日都陰天，下午同夜晚都有落雨，所以天氣有啲凍。 而不影子是因為前一晚陪產而冇乜點瞓到，所以基本上今日九點幾就瞓到成隻豬咁…至於目前同影子同房嘅就有貓妹同埋佢三隻貓BB…其實話自己瞓到成隻豬咁係有啲誇張啦… 因為影子有保持警覺，隨時留意住貓妹同三隻貓BB嘅情況，而且影子係好淺眠嘅人，所以即使瞓著都偶爾會聽到貓BB嘅叫聲。 直到凌晨兩點出，影子有種已經瞓飽嘅感覺（明明只係瞓咗四粒鐘）就係有種已經充飽電嘅感覺…所以我就係咁易轉頭望咗貓妹同佢嘅BB一眼就繼續瞓。點知過咗冇幾耐，感覺到貓妹爬咗上床， 緊貼住影子趴喺度休息，影子其實有睇驚佢會喺張床度尿尿或便便…所以有時不時望下佢、摸下佢，睇佢有冇踎喺度準備尿尿之類嘅動作…所以從貓妹爬上嚟之後基本上影子係冇真正瞓著嘅… 佢一時瞓喺度好安靜，一時又會一直係床上面行嚟行去，偶爾又會踩到自己，所以根本冇辦法真正瞓著。 （點解唔趕佢落床？）一嚟係覺得天氣咁凍，佢爬上嚟都係情有可原（而且佢本身都好暖，可以為影子取暖，我哋兩個算係互相取暖）二嚟係見佢啱啱生完貓BB，就俾佢喺床度休息得舒服啲… 
就係咁一直到凌晨四點幾， 影子感覺到背脊有嘢旭嚟旭去（當時側睡緊）起初仲以為係貓妹嘅腳仔踢到自己，所以就冇為意…後來感覺到背脊有嘢踢到之餘，連腳都有嘢踩緊，影子當場嚇到彈起，因為同一時間貓妹點可能喺兩個部位出現， 前爪同後爪？點會？佢嘅身體邊有咁長？所以影子彈起身之後發現原來佢將其中一隻貓BB叼埋上嚟放喺影子嘅背脊度（大概又係因為取暖）還好當時影子唔係真係瞓著，不至於壓扁隻貓BB…（喺影子彈起嗰剎那，貓妹喺度叼緊第二隻貓BB放喺我腳邊）原來貓妹一開始係以身試法睇下影子俾唔俾自己係床度休息， 當佢發現影子唔抗拒時，就帶埋佢嘅貓BB上嚟，真係聰明👍🏻
#Day-3
尋晚貓妹同佢嘅三隻BB都係喺影子嘅房間休息，呢次係喺凌晨四點幾佢先爬上嚟休息。哇塞！影子睇見床單上出現咗血跡（大概喺貓妹嘅子宮入面啲血還仲未清曬）貓妹嘅上一胎都有出現過呢種情況。影子唯有幫佢用衛生紙抹乾淨…之後冇幾耐，佢又逐一將佢嘅貓BB叼上嚟，影子太攰了，就由得佢哋一家四口喺埋影子嘅床度瞓到天光。 天光之後，影子有將佢哋移返去書檯底，不過呢次貓妹似乎好似覺得已經得到影子嘅permission咁，又一家四口爬上影子張床度瞓，移走完，佢又叼返上去。OMG！呢次唔止有貓妹嘅血跡，貓BB仲瀨咗尿㖭…還好只係一小滴，所以影子用濕紙巾抹一輪後再噴消毒劑， 可能消毒劑嘅味道貓妹唔鐘意，結果佢就叼曬啲貓BB去電視機架後面…可能呢個位置佢比較有安全感。影子呢次冇再阻止，因為佢依家已經唔要留喺書檯底， 一味要係床度，如果我喺床上面墊報紙同布料又會因為移位而整污糟床單…所以影子就冇阻止佢自己搵地方休息，不過影子都係會密切留言貓BB嘅情況。
其實話自己瞓到成隻豬咁係有啲誇張啦…
而且影子係好淺眠嘅人，所以即使瞓著都偶爾會聽到貓BB嘅叫聲。
點知過咗冇幾耐，感覺到貓妹爬咗上床，
所以從貓妹爬上嚟之後基本上影子係冇真正瞓著嘅…
偶爾又會踩到自己，所以根本冇辦法真正瞓著。
就係咁一直到凌晨四點幾，
影子當場嚇到彈起，因為同一時間貓妹點可能喺兩個部位出現，
原來貓妹一開始係以身試法睇下影子俾唔俾自己係床度休息，
影子太攰了，就由得佢哋一家四口喺埋影子嘅床度瞓到天光。
所以影子用濕紙巾抹一輪後再噴消毒劑，
影子呢次冇再阻止，因為佢依家已經唔要留喺書檯底，
不過影子都係會密切留言貓BB嘅情況。
No comments:
Post a Comment