話說近呢幾日只要貓妹願意，影子都會俾佢留係屋入面過夜，因為已經知道佢喺呢幾日之內就會生貓BB。 其實喺前一晚（即係禮拜一夜晚）影子大概估到喺當晚深夜或者隔日朝早貓BB就會出世，因為當時貓妹喺成間屋嘅窿窿嚹嚹都鑽暈，貌似搵緊位嚟生BB… 而且佢嘅肚皮已經好明顯睇到有一個部位特別凸， 或者就係貓BB嘅頭仔定係腳仔伸得特別長之類嘅…果然就喺當晚深夜，突然聽見貓妹係度叫，影子都好神經質咁一聽見貓叫就即刻彈起身， 發現當時只係深夜兩點半，距離天光仲有好耐…而且影子先啱啱瞓著冇耐，不過影子都係開門睇下貓妹咩事。 貓妹淨係好不安咁一直叫，又一直行上行落，影子有嘗試開門俾佢睇下佢係咪想去尿尿（因為屋入面冇貓砂盆）不過佢喺門口企咗陣又返入屋，影子只好再刪返度門（鬼月深夜仲去開門其實影子都有啲驚驚）而貓妹又繼續行上行落…期間影子有檢查貓妹嘅屁屁部份（係咪叫產道？）係咪已經有分娩前嘅跡象…（貓妹上一次分娩嗰陣有啲紅紅哋嘅嘢喺上面） 不過冇發現到有嘢…
影子唸起貓妹係屬於分娩前會黏住主人， 想要主人陪產嗰類貓咪，由於上一次影子冇陪貓貓嘅經驗，有啲怕血淋淋畫面加上咁啱嗰次係早晨，所以冇陪到貓妹，所以呢次就打算彌補一下。影子就一直陪住佢…影子俾貓妹入自己間房，期間佢仲係一直叫，直到佢喺影子嘅床度休息佢先冇再叫， 期間佢仲枕住喺影子嘅大脾度（可能嗰陣佢開始宮縮）到咗三點半左右，佢已經穿咗羊水，好彩影子事先有墊咗塊布喺張床度。
其實貓咪生BB都係好辛苦，唔親眼見過真係冇辦法想象。佢開始“谷”嘅時候發出嘅聲同人類真係好相似，仲有超多平時唔會出現嘅聲…
雖然貓妹呢次係第二胎，不過睇見佢又痛又驚嗰樣，真係想打扁嗰隻公貓。 貓妹“谷”咗接近一個鐘先誕下第一只貓BB，影子可以講係親眼睇住貓BB出世，然後貓妹可能醞釀緊生第二隻貓BB，所以冇理到第一隻貓BB，直接走咗去書檯低。
由於貓妹上一胎因為忽略咗其中一隻而導致貓BB窒息，所以呢次影子發現貓妹走開走之後，就用紙巾抹走貓BB頭部嘅黏膜，至於胎盤跟臍帶，影子不敢亂咁幫貓BB剪，所以就將貓BB放喺貓妹附近，佢遲啲應該會處理。（最重要係先防止貓BB窒息）不過貓妹都淨係定定望咁住隻貓BB，冇任何動作，可能係佢驚影子望住佢，所以唔敢掂貓BB…所以影子只好趁空檔先去瞓一陣。（嗰陣已經凌晨四點幾） 一直到早上七點幾，影子都係半夢半醒冇真正瞓著。而且仲聽到貓BB嘅叫聲越嚟越多，醒嚟之後就睇見呢個畫面啦…👏🏻WOW…好似有一隻係三色貓喔…
影呢張相之前，其中一隻貓BB距離貓媽媽一段距離， 影子唯有捉過去俾佢去媽媽度飲奶😆 可能貓妹係喺影子嘅書檯底生貓BB（佢唔肯喺影子準備嘅盆度生）所以今朝當影子想要將三隻貓BB放入盆度移去其他地方嗰陣，貓妹即刻叼咗其中一隻去電視機架後面，（上一胎佢就係咁將貓BB收埋喺嗰度）嗰度雜物太多，影子睇唔清楚貓妹嘅照顧情況，怕好似之前咁令到貓BB夭折，所以呢次喺佢叼走第二隻之前，影子就將啲貓BB放返喺書檯底嘅原位（清理乾淨貓妹分娩嘅血跡後）然後將貓妹叼走嗰隻都捉咗返原位。之後就有個有趣嘅畫面（可能對貓妹嚟講係殘忍）因為佢一直好緊張咁一邊行一邊喵喵叫，不斷爬入電視機架後面又爬返出嚟…連早餐都唔肯食。影子真係後知後覺，喺貓妹重複咗幾次呢個動作後， 影子先唸到可能佢係搵緊佢頭先叼過去嘅貓BB…（影子唔理解明明三隻已經喺齊度，貓妹仲要搵啲乜？）可能貓貓嘅概念喺佢叼咗幾隻走，就要叼返幾隻嚟… 所以影子唯有將佢頭先叼走嘅貓BB放喺佢面前，俾佢自己叼返去書檯底，佢就安樂曬… 哈哈哈！ 由于成晚冇點瞓到，今日有啲頭痛…就寫到呢度先啦…
而且佢嘅肚皮已經好明顯睇到有一個部位特別凸，
影子都好神經質咁一聽見貓叫就即刻彈起身，
不過影子都係開門睇下貓妹咩事。
（貓妹上一次分娩嗰陣有啲紅紅哋嘅嘢喺上面）
影子唸起貓妹係屬於分娩前會黏住主人，
直到佢喺影子嘅床度休息佢先冇再叫，
不過睇見佢又痛又驚嗰樣，真係想打扁嗰隻公貓。
影呢張相之前，其中一隻貓BB距離貓媽媽一段距離，
影子真係後知後覺，喺貓妹重複咗幾次呢個動作後，
可能貓貓嘅概念喺佢叼咗幾隻走，就要叼返幾隻嚟…
俾佢自己叼返去書檯底，佢就安樂曬…
No comments:
Post a Comment