B.A.P
Live On Earth In Singapore由買到飛到演唱會嚟到呢一日並唔係等咗好耐，一個幾禮拜啫…但係就擔心咗好耐，因為買到飛之後我就一直病，擔心因為病而去唔到嘅話，唔單止嗮咗一筆錢，仲會嗮咗一次機會...嗮咗機會嗰下最心痛。.png)
不過好彩就係喺最關鍵嘅呢日，病情突然好轉咗，總算可以精神奕奕咁去睇B.A.P啦…呢日（8月8號）係馬來同胞新年（公假）所以小哈唔駛返工，公司得我自己一個人喺度搏殺，話說都好耐冇自己一個人開工咗，一個人雖然比較忙，不過就充實好多…身體已經冇唔舒服咗，所以就嗱嗱聲搞掂工作嘅嘢等收工。巫婆喺我走嗰陣都仲未到公司，以前三點不露，依家就四點不露== 四點半左右先起程去The
Star Theatre，我唔想好似之前SS5咁等咁耐，橫掂係對號入座嘅，所以咪唸住差唔多到入場時間先至去。The
Star Theatre比室內體育館遠好多，所以去到現場已經5點幾，例牌見到好多人，但係唯一唔同嘅係：呢次喺現場嘅人並唔係個個都係嚟睇演唱會嘅…因為The Star Theatre裡面有好多特色餐廳，所以亦有好多遊客喺裡面“hae”… 裡面真係好靚，我喺底樓望咗幾眼之後就上咗去3樓，見到好多Baby已經喺度等入場，周邊攤位排嗮長龍，所以我就打消買周邊嘅念頭…行埋一邊睇下風景好過（建築物全部係透明嘅落地玻璃）嗰陣天仲好光，所以可以好清楚咁睇到外面嘅風景，之後冇耐就開始入場咗…入場之前又要例牌檢查包包…我記得我買到嘅位置係要上去8樓入場，但係嗰陣連嗰個scan
machine都玩我，一直scan唔到我張飛，結果要staff開另一道門俾我入，嚸解次次都要咁特別？ 更特別嘅係…一路上都好靜…可能係分太多入口入場，所以喺我行去入場嘅路上，一直都係得我一個人，之後staff過嚟帶位嗰陣，我覺得自己好似貴賓咁…（唸太多…）坐咗落自己嘅位嗰陣，我有啲擔心會瞓著…因為張凳太舒服！！！！哈哈哈哈哈哈哈哈！！！唯一唔舒服嘅就係坐喺隔離嗰個男飯！！條麻甩一直翹起二郎腿，仲伸到好埋嚟！！勁冇禮貌！！你估呢度係你屋企吖？！懶有型咁！！真係想掃佢隻腳落嚟！！而左邊隔離就坐咗個好斯文嘅妹妹仔。我入去嗰陣仲唔係好多人入場，所以嗰陣舞臺睇得好清楚。之後觀眾入得八八九九嗰陣，我發現原來B.A.P啲歌迷年齡層都幾廣，男女老少都有，我前面嗰排就坐咗幾個“大姐姐”同“大哥哥”飯。雖然冇全場爆滿，不過入座率應該都有超過9成… 開場之前，大螢幕播放咗佢哋嗰首好有爭議性嘅MV
<Badman>之後冇耐就開始咗開場VCR…喺度我要贊一贊佢哋嘅舞臺效果，雖然舞臺細細哋…不過燈光效果超勁！！開場VCR播出嗰陣，啲燈光折射令到我覺得自己真係置身喺外太空咁…啲光就喺四周圍閃，七彩繽紛嘅感覺，亦都好似置身喺銀河系…呢個演唱會主題係“Live
on Earth”嘛…VCR要表達佢哋由外星登陸地球，所以無論係啲燈光效果定係螢幕啲畫面，都係勁靚~ 佢哋一出場就著住我最鐘意嘅顏色（白色）舞衣出場，<Warrior>,
<What The Hell>, <No Mercy>一連唱咗三首快歌，我記得嗰個JongUp有一個動作站唔穩，我唔識形容當時佢嘅動作…對唔住！！我嗰陣有笑咗出嚟…心唸： “啱啱開場就腳軟？尋晚彩排到好夜？”但係佢喺<No Mercy>嗰個地板動作好perfect！！扳回一城！！入場之前，我見到有baby帶哨子，但係之後音樂太大聲，<Warrior>嗰陣我淨係聽到音樂入面嘅哨子聲，現場嘅完全聽唔到。喺演唱期間，我見到有幾個飯因為影相而俾保安手指指咁喺度警告，唉…真係超級嚴格啊！！手機啫…都影唔到啲乜啦！！ MENT嗰陣，現場並冇翻譯員，因為佢哋有三位成員英語都講得好好。Bang，YoungJae同Zelo…你哋好勁！！至於講韓語嘅皇上…臣妾聽唔明你講乜…%>_<%雖然係咁，但係無論講韓語嘅成員講咗啲乜，babyz都熱烈回應（原來你哋聽得明）我就依然保持冷靜…（抵打！！） 接住就係Bang同皇上一齊演繹<I Remember>，同埋另外四位成員演繹<Secret Love>,喺呢度要提一提嘅係嗰個門面HimChan代替咗皇上平時演繹嘅部分，我嗰陣覺得佢唱歌把聲真係好得意，可能平時好少機會聽到佢深情演唱，所以呢次算係幾特別嘅經驗…緊接住就係皇上同YoungJae呢兩個主音一齊演繹<I Believe I Can Fly>唱家班即係唱家班，一個字： “掂” 吖！！之後Zelo同好安靜嘅JongUp一齊表演<Never Give Up>,開始嗰陣我有啲奇怪，嚸解Zelo呢次嘅拍檔唔係Bang而係JongUp？原來<Never Give Up>之後緊接住就係Bang出嚟刮碟…佢混音嗰首音樂真係好正！！真係多才多藝！！ 係咪好奇怪嚸解演唱會嚟到呢度仲係記得咁清楚？我都唔知…哈哈哈哈哈哈！！不過接落嚟嘅就真係冇記得咁清楚啦！！之後嘅就儘量根據我嘅記憶複述啦… 喺第二度MENT嗰陣，佢哋用一個幾特別嘅方式嚟介紹自己，佢哋輪流走到大螢幕度“scan”出自己嘅特色，原來HimChan嘅Bang聲帶模仿都模仿得幾似。至於皇上即興模仿Zelo嘅反轉rap仲俾Zelo贊：“He better
than me.”喺呢一整段落嚟，都過得好歡樂。唔知嚸解，我覺得成場演唱會完全冇悶場，每一首歌都真係好好好好好好聽！！ 好快，佢哋就宣佈到咗最後一首歌，嗰陣先7點半，佢哋出道得一年幾，歌曲數目方面唔算多，所以之前已經大概知道演唱會應該唔會好長，但係就真係冇唸過會短成咁…最後一首歌<Goodbye>，唱到“No more cry…goodbye…goodbye” 嗰陣，連我都有啲想喊… VCR播佢哋要返外星咗，Babyz瘋狂咁encore，佢哋不負眾望再次出場。唔係好記得encore前定encore後，唱<Fight For Freedom>嗰陣，Bang支mic一直失靈，好尷尬… 呢次演唱會之後，發現YoungJae嘅“瞓”住唱功力，係繼蕭敬騰之後第二個令我覺得好佩服嘅人！！<COMA>喺跳咗一大輪之後，接近尾聲嗰陣全員“瞓”嗮喺地板，YoungJae就係咁瞓喺度唱咗一段，一樣唱得咁准咁清楚，可想而知佢嘅中氣有幾足，呢樣嘢唔係個個都做得到。 Encore曲嗰陣，佢哋選唱嘅都係輕鬆愉快嘅歌，<Dancing
In The Rain> ，<Stop
It>都係我好鐘意嘅歌，（基本上佢哋成晚唱過嘅歌我都好鐘意）.png)
同全場觀眾大合照之後，<Crash>就真係真係最後一首歌咗…觀眾席連同底層一共有三層，我當時喺第二層，喺最底層嘅babyz呢個時候湧嗮去台前，可以理解嘅…因為真係好唔拾得佢哋！！！如果我當時喺底層，我唸我都會跟住湧埋上去。演唱會就喺非常唔拾得嘅情況底下結束，嗰陣先至8點鐘左右。B.A.P離開舞臺之後，babyz都留喺場內影相留念，嗰陣啲staff已經冇權阻止，我都喺場內影咗啲相之後就離開演唱會會場。The
Star Theatre實在太靚，冇乜拾得走，加上嗰陣時間仲早，所以我又喺嗰度影咗啲相先離開。 呢次我冇用GPS嚟搵地鐵站咗，因為地鐵站好近，一眼就望到咗…一路上，我見到好多baby企嗮喺停車場外面嘅馬路度等佢哋出嚟，我都企響度八咗一陣，之後真係頂唔順就走咗…我之所以頂唔順，係因為有好多蚊係咁針我吖！！！ 返到去我上網搵咗一輪，發覺真係冇乜人影到相，唉…嚸解啲保安咁勤力？嚸解啲保安唔偷下懶睇演唱會？嚸解啲保安下下都咁落力kup實嗮啲觀眾有冇影相？但係我都好佩服某一小部分嘅baby，因為佢哋都有影到好正嘅相…掌聲鼓勵鼓勵！！！
.png)
.png)
No comments:
Post a Comment