例牌喺寫完演唱會記述之後，都會寫一篇後記嚟記錄一下觀後感…
B.A.P亦都係我喺佢哋一出道就鐘意到依家嘅團體，
雖然我並唔係百分百嘅“純baby”，
可能我鐘意嘅歌手真係好多，我從來唔敢講我係“純乜”、“純乜”…
我淨係敢講我鐘意聽佢哋唱歌，鐘意睇佢哋表演、
我會買佢哋嘅專輯、我亦都會去睇佢哋嘅演唱會，就係咁…
B.A.P
Live On Earth Singapore
係我人生中第二次自己一個人去睇嘅演唱會，
第一次見到B.A.P、第一次見到SM公司以外嘅kpop偶像。
呢一次睇演唱會之前因為病咗好耐，
呢段時間完全冇精神去留意佢哋嘅動向，
亦都冇精神喺演唱會嚟之前去溫習佢哋啲歌。
雖然係咁…但係喺演唱會度，
當我發現我幾乎喺音樂一響起就講得出咩歌名嗰陣，
我先唸起原來我平時已經有不斷咁聽佢哋嘅歌，
原來…我對佢哋嘅歌係咁熟悉…
原來…我係咁鐘意佢哋…
唸返起喺演唱會冇唱歌嘅時間入面，皇上幾乎都一直喺度笑笑笑…
又係咁“fing”佢嗰執“蔭”（溜海）
成晚電到臣妾暈陀陀…皇上你真係衰嘅jek…
搞到臣妾冇辦法唔拜倒你嘅“龍袍”之下…
“長條型”嘅老么Zelo簡直有大哥風範，一直喺度帶動氣氛。
記得之前喺一個綜藝節目入面，隊長Bang講過Zelo嘅缺點就係唔係好識講嘢，
但係依家Zelo似乎進步咗好多，大個仔咗！！
而當時Bang講Zelo嘅優點係年紀好細但係就識得好多嘢…
似乎又係真嘅喔…
其實Bang都有進步，以前佢唔識裝可愛，呢次喺演唱會度，
佢都表演咗一段Gwiyomi，反而係皇上就怕醜得濟，
做咗兩個表情就宣佈放棄…
皇上嘅高音真係可以用“繞梁三日”嚟形容，
<Punch>係最多高音嘅一首，嗰陣皇上飆嘅高音我印象最深刻。
雖然偶爾我腦海會飄過“唱功有待再加強”嘅唸法，
但係整體嚟講，佢哋已經算係好犀利！！
喺啱啱開場嗰陣，有一段舞臺噴火焰嘅效果，
可能場地唔算太大，又或者係我坐得唔算太遠，
我記得嗰陣有feel到火焰嘅熾熱，
觀眾席喺咁遠都feel到熱，喺舞臺上面嘅佢哋應該仲熱…辛苦嗮了！！
喺演繹<Power>嗰陣，中段部份佢哋有噴一樣嘢，
以前我一直好奇佢哋噴出嚟嘅嘢到底有冇味道，
但係唔知係咪心理作用，<Power>唱到接近尾聲嗰陣，
我好似聞到一啲香味，佢哋噴嘅莫非真係香水？
定係空氣芳香劑？
我真係無聊，咁都唸得一餐。
其實我覺得babyz都好乖，
因為我後來發現觀眾席同舞臺之間好似係冇欄杆阻隔，
佢哋完全係乖乖咁坐喺度睇。
淨係喺演唱會結束嗰陣，babyz太唔拾得佢哋，
嗰陣先開始湧到舞臺前面同佢哋握手。
有啲嘢我特別想同佢哋講…
Bang你戴帽特別好睇（同埋你真係好瘦）
HimChan你露額頭特別好睇（雖然有啲邪惡邪惡咁…）
DaeHyun皇上無論你做啲乜都係咁好睇（無視我特別偏心佢）
YoungJae你唱歌真係好得！！（唔知你依家仲係咪簽王？）
JongUp你真係好靜，除咗跳舞嗰陣識發光之外…（其他時候你幾乎都喺度收埋自己）
Zelo…you are
so cute！！！
好難忘記佢哋同我哋大合照嗰陣嗰句：“kimchi~~”
真係好得意...
呢次雖然冇辦法好近距離睇見佢哋，但係我已經好滿足…
雖然買唔到最靠近舞臺嘅飛，但係由於舞臺得一個，
反而全程嘅表演都睇得到，冇miss到任何一part…
我理解乜嘢係唔可以得一想二，知足先會常樂呢個道理…
所以…
我真係衷心感謝B.A.P帶俾我哋一個咁完美嘅演出…
BEST
、ABSOLUTE、PERFECT
你哋冇改錯名！！你哋真係做到咗！！
呢一次演唱會舉辦嘅地點真係好特別，真心佩服呢座建築物嘅設計師，
同埋如果唔係因為呢場演唱會，我唸我都唔會認識到呢個地方。
B.A.P
Live On Earth Singapore
報告完畢…
No comments:
Post a Comment