♡♡♡♡♥♥♡♡♡♡♥♥♡♡♡♡♥♥♡♡♡♡
2017年一眨眼就已經完結了，
又再渾渾噩噩咁過咗一年，2018年有乜目標？有冇咩理想？
erm…我似乎冇~~
有人話：“做人冇理想同條鹹魚有乜分別？！”
但其實鹹魚至少仲可以食一餐呃…
呢一年嚟，真係覺得自己連條鹹魚都不如。
早幾年仲後生個陣就話可以叫“廢青”啫，
點知眨下眼依家就已經變咗“廢柴” …
時間過得真係快…（喂！放錯重點。）
♡♡♡♡♥♥♡♡♡♡♥♥♡♡♡♡♥♥♡♡♡♡
唔知吖…就係今年先至意識到自己真係老啦…
覺得自己好容易攰，
白頭髮多咗、髮質又差嗮，仲發福咗添呀…
有時就覺得自己充滿動力，呢度去嗰度去，
有時就會懶到乜都唔想做，凈係想摊響度唔想旭，
間房已經亂過亂葬崗都唔想執。
原本呢篇文章打算2018嚟到之前寫完，
點知有時懶、有時攰、有時又唔舒服，
結果拖到今日。
♡♡♡♡♥♥♡♡♡♡♥♥♡♡♡♡♥♥♡♡♡♡
回顧2017，好似係記錄上睇咗最多演唱會嘅一年，
冇辦法出國旅行，可以睇下演唱會其實都幾盞吖…
都幾enjoy喺演唱會入面嘅感覺，
雖然未曾試過好似其他觀眾咁high，亦未曾尖叫吶喊，
不過就係幾鐘意睇現場嗰種感覺。
♡♡♡♡♥♥♡♡♡♡♥♥♡♡♡♡♥♥♡♡♡♡
年紀大咗真係會變得好唔同架~~
口味都會開始改變，例如：
以前唔鐘意食苦瓜同豬腳，依家居然會覺得其實兩樣都係好好味。
以前就求其食啲嘢填飽個肚就算，
 |
| 奶油蝦 |
依家就會開始想均衡飲食，攝取足夠營養，得閒就自己整幾味。
 |
| 油炸蔬菜 |
以前好懶去保養，依家…雖然都係懶…
不過就比以前做多少少，可能真係年紀大咗啦…
除咗外在嘅皮膚保養，仲開始咗服用酵素排毒、補充膠原蛋白，
erm…
不過凈係呢啲基本嘢都要好大一筆花費下…
錢真係唔kum洗…
（今年好似特別錫自己。）
♡♡♡♡♥♥♡♡♡♡♥♥♡♡♡♡♥♥♡♡♡♡
喺之前咪話過反巫婆嘅…
結果巫婆即刻請個人嚟，唔使講梗係唸住踢我走啦~~
冇咁易，佢想可以好似以前咁整到我唔開心自己走人？
到咗今時今日，仲有咁易咩？
結果唔單止整我唔到，仲俾我激返轉頭，
抵死！！
喺呢個世界…呃…將範圍縮返細啲啦…
喺呢間公司，唔係個個都咁低能會做佢只狗嘅，
人係有思想嘅生物，咪唸住下下控制人啦！
依家係咩世界，巫婆仲唸住自己有能力招軍買馬？
慳啲啦！！
You are nothing !!
♡♡♡♡♥♥♡♡♡♡♥♥♡♡♡♡♥♥♡♡♡♡
或者一般人都會覺得我喺度浪費緊生命，
其實連我自己都係咁覺得…
但係我又會唸，自己究竟想要啲乜嘢？
我又講唔出要啲乜，要啲乜呢？
我真係唔知…
人生究竟要點先算圓滿？
搵個人嫁咗去？要結婚生仔先叫圓滿？
但係我又好清楚我要嘅唔係呢樣嘢….
或者，我要嘅就係好似依家咁，靠自己…
偶爾會孤單，但係至少我唔係人哋嘅附屬品，
唔使靠男人生活，自己一個生活，想點就點…
冇錯…
原來我要嘅生活就係咁簡單…
我要嘅生活就係自己一個人工作、賺錢、生活…
就係咁簡單。
（難怪我從來唔羨慕人哋一雙一對）
反而崇拜單身主義者。
♡♡♡♡♥♥♡♡♡♡♥♥♡♡♡♡♥♥♡♡♡♡
♡♡♡♡♥♥♡♡♡♡♥♥♡♡♡♡♥♥♡♡♡♡
♡♡♡♡♥♥♡♡♡♡♥♥♡♡♡♡♥♥♡♡♡♡
No comments:
Post a Comment