第一篇

話說，已經好耐冇用粵語嚟寫嘢了

（應該係話已經好耐都冇乜點寫嘢先啱）

可能係覺得自己嘅部落已經完全冇人會睇呱...

咁講其實又會有啲奇怪，日記原本嘅意義其實係寫嚟記錄自己嘅生活，

而唔係寫嚟俾人哋睇先啱，不過隨著網絡嘅發展，日記變成網誌之後，

好似又有另一番新氣象，好多人都開始寫一啲可以俾人睇嘅日記，

包括影子自己，不過...近呢兩年...影子都開始對呢個行為有啲厭倦了，

除非有啲特別嘅事發生。

2017年了，今日嘅影子同以前嘅影子冇太大改變，

都係獨來獨往嘅一個人，仲係越嚟越孤獨嗰隻。

今日，影子過咗一個異常孤獨嘅新年，唔知點解會咁，

覺得全世界好似得返自己一個人，冇人可以講話，

就係得自己一個...

到底係冇人可以溝通？定係自己唔想同人溝通，

連自己都越嚟越唔清楚。

呢篇文章係我喺2017年嘅第一篇文章，

亦都係2017年第一篇用粵語寫嘅文章，太耐冇type粵語字，

真係type咗超耐，好啦...希望搜狗輸入法好好記住影子輸入嘅字，

等影子下一篇可以寫得快啲...XD