等咗個幾月，呢一日終於嚟了！！其實直到今日為止，我依然好擔心喺搖滾區會俾人哋打到...哈哈哈！！我真係好無聊...
話說最近都逼自己要早啲瞓，因為就嚟要去睇Super Show 5，絕對唔可以出啲咩狀況。但係我就係咁抵死，唔到淩晨一點都唔願瞓，尋晚都一樣...一點幾先瞓，六點幾就醒咗嚸都瞓唔返，我真係好驚等陣會頭痛！！其實我尋晚發咗個夢，夢見自己已經喺演唱會入面嘅搖滾區度，夢境入面嘅搖滾區好空蕩，我企喺入面好鬼“他條”唸返起呢個夢真係好白癡 =____= 其實我所謂嘅瞓唔返，係嗰種半睡半醒嘅狀態，我逼自己再瞓多陣（又逼？）瞓多一分鐘得一分鐘，然後就咁一瞓瞓到八點！！！返工又遲到咗！！ 去到公司就一直喺度等收工，因為兩點就可以“鬆人”咗！！喺兩點之前我都一直喺臉書度遊蕩，一直同尋晚先認識嘅妖精傾計，真係估唔到會遇到識唔夠24小時就可以有咁多嘢傾嘅朋友，幸福...喺呢段期間嗰個CCH（credit card holder）前輩就走咗入office吹水，知道我今日要去睇演唱會（仲唱到全公司都知道我今日要去睇Super Junior，原來SJ都真係幾紅（廢話）連公司裡面嘅麻甩佬都聽過佢哋嘅名^^）我就乘機問佢由我呢度去體育館要幾耐，MRT幾點結束服務之類，因為我要plan一plan來回嘅事...（處女座特徵——plan嘢）但係佢話佢幾十年冇搭過MRT咗...=__=問小哈，小哈又話佢未試過搭最後嗰班車...呢兩個新加坡人，真係問嚟問去得個吉。之後嗰個CCH前輩話佢要去東海岸，可以順路車埋我去體育館，有順風車搭梗係好啦！！一嚟可以慳返啲車錢，二嚟唔駛擔心搵體育館搵到成身大汗...哈哈哈！！！（其實去東海岸係咪真係順路經過體育館？我呢個路癡真係唔知） 之後4點鐘左右就到咗Singapore Indoor Stadium，嗰時已經好多妹妹仔喺度等...一開始我有啲驚，因為放眼望去，全部都系有同伴嘅...係得我一支公，嗰時有唸過想join尋晚先識嘅嗰位妖精妹妹，因為佢都好似係一個人嚟，但係當時網路用唔到，加上我又冇同佢約定嘅...無剌剌join人哋好似唔係幾好，所以我就走咗去周邊攤位度買咗螢光棒先...行到一半，已經睇到有人捧住個紙皮箱喺度兜售官方螢光棒，我咪嗱嗱聲買咗之後就埋邊坐。 之後就見到一班妹妹仔係咁尖叫係咁跑，先知原來頭先係Henry喺嗰度經過。然後我就癡癡呆呆咁坐埋一邊等...嗰陣先四點幾，又上唔到網真係悶到爆，坐喺走廊又被啲staff趕，結果俾人趕到路邊坐，嗰陣真係無聊到同坐喺對面啲妹妹仔你眼望我眼，睇下佢哋啲應援物、衣著等等嚟打發時間，唸起都覺得自己當時嚸解會咁無聊，不過呢段時間我得出幾個結論：妖精妹妹90%都係著住好短嘅短褲，（包括我自己都係...哈哈哈！！雖然我唔算係妹妹仔）大部分都著平底鞋...（我都係...
^^）98%都係女仔，我坐咗接近兩個鐘，除咗staff之外我喺現場見到嘅男仔唔超過10個...好似到咗女兒國咁 ^————^可能咁啱啲男仔去咗第二度。 然後差唔多6點咗，坐喺隔離啲妹妹仔全部走嗮去準備入場，我都走咗去搵入口，但係問題嚟了...我傻下傻下根本唔知搖滾區要喺邊度入去，所以就是但搵個入口，等啲staff指示，（我真係得嘅啦！！）然後啲staff都幾好禮貌咁同我講要去另一個方向，但係佢求其指，我又係方向白癡，所以我懞喳喳咁依然唔知喺邊入先啱，所以就自己走咗去問另一位staff，show英語time~~~好彩我啲英文仲應付得嚟...不過我後來都仲係搵唔到！！（我真係得嘅啦！！哈哈哈哈！！）唯有向嗰啲同我一樣‘頭鱷鱷’貌似搵緊入口嘅人落手，我大概問咗N個路人，先搵到一個“類似”係俾PEN D入嘅入口，嗰個staff仲得過我，一嘢就撕咗張slip落嚟，仲係撕咗先問佢啲同事PEN
“O”喺邊？？？！！我心唸：“先生，邊度走嚟PEN “O”啊！！”然後佢因為撕錯咗我張飛，有啲慌張...所以推開啲欄杆俾我炒捷徑直接走去PEN D入口通道，搞到啲妹妹仔好好奇咁啤住我，唔理得咁多，因為終於可以排到PEN D嘅隊伍準備入場啦... 然後我就見到三個稀有嘅男飯就排喺我前面，其中兩個仲“得得哋”（仲有心情kup靚仔）之後入到場內咗，發覺啲邊邊都已經站滿咗人，我唯有揀最靠邊嘅地方企。嗰時有啲錯愕...因為我發覺原來室內體育館比我想像中細好多，大螢幕都幾近下，可以睇得好清楚...（可能上次俾SMT喺濱海灣嗰個舞臺嚇到，所以一直誤解以為全部舞臺都係好遠好遠嘅...） 等咗一陣，我發覺頭先嗰三個男飯（就係我話其中兩個“得得哋”嘅男飯）就企喺我十點鐘方向，可能男飯真係好罕見...企喺我後面嘅妹妹仔都留意到佢哋三個，仲一直喺度講：“還蠻帥的...”“遠看還行，不過近看就不知道了...”因為我近距離睇過佢哋，所以聽到妹妹仔咁講之後，我當時都幾想同佢哋講：“近看也蠻帥哦！！”哈哈哈！！我先冇咁八卦啊！！！其實我唔係有心八卦人哋講乜架！！係佢哋講得大聲咋！！嗰三個男飯企喺冇乜人企嘅地方，可能唔好意思同女仔逼...（男飯唔易當）等咗10分鐘，已經冇人入場咗...成個PEN D都好空下...（空到可以打筋斗）同我尋晚夢境入面嘅情況一模一樣！！又嚇到！！ 舞臺唔係“田”字形，變咗“王”字型，嗰時有啲擔心，擔心後面都冇舞臺延伸，我所在嘅PEN D左手邊完全係空嘅...所以我一直回頭睇後面有冇舞臺，萬一冇嘅話，我成晚都淨係可以睇大螢幕了！！因為前面已經滿嗮人，根本冇得逼咗...
No comments:
Post a Comment