"... ♪ Music Walker ♪... ♪ Music Walker ♪... ♪ Music Walker ♪ ...”
這回是隔了最久寫觀後感の一次，
因為最近…好像經常都是，每天都覺得好累。
每天上班の時候都想趕快下班回去寫，結果回住所後就覺得很累，
而且最近過得真の很疲憊。
這次の演唱會の主人翁是草蜢哥哥…
既然主人翁係 草蜢 哥哥，咁以下落嚟影子就用粵語嚟寫啦…
點講咧？
首先，唔好問我點解啲相畫質咁差...
用手機影架咋...唔好嫌棄啦~~（大炮帶唔入去啦~~）
言歸正傳...
草蜢哥哥可以講係陪住好多人成長個長青組合…（包括影子）
佢哋喺舞臺嘅風采真係非常值得一睹嘅…
最難得嘅經驗係可以喺同一個場內睇見唔同年齡階層嘅男女濟濟一堂，
影子嘅隔離坐咗個長輩，原本以為係仔仔女女帶佢嚟，
後來先知佢係自己一個人嚟…
好多時候佢都會企起身跟住音樂搖擺。
至於影子前面就坐咗個細路，
不過開場冇幾耐佢就一直坐喺佢爸爸大髀度…好得意…哈哈哈
呢場演唱會同影子以前睇過嘅演唱會感覺好唔同，
睇得好enjoy好開心，
即使有人想笑影子係老餅都冇所謂，
崇拜草蜢哥哥係影子嘅光榮…
"...
♪
Music Walker ♪... ♪ Music Walker ♪... ♪ Music Walker ♪ ...”
"...
♪
Music Walker ♪... ♪ Music Walker ♪... ♪ Music Walker ♪ ...”
其實喺演唱會來臨之前，影子有啲啲擔心因為係新加坡場嘅關係，
佢哋會全程講國語（畢竟國語唔係佢哋嘅專長）
影子驚聽到耳仔生曬蘑菇（影子大膽！！）
不過好彩佢哋全程用廣東話，
係咯…咁先原汁原味架嘛…
好鐘意睇佢哋喺台上互動，
你“侄”下我，我“侄”下你咁…
真係要感情好好嘅拍檔、家人先會有咁開心、咁真誠嘅互動。
畢竟依家咁嘅社會，真誠難搵過真愛，
搵朋友仲難過揾銀紙。
<Lonely>嘅時候，有個好感人嘅畫面，
觀眾都開著咗手機嘅flashlight，好靚…
真係好靚！！！
呢個畫面好感人，草蜢哥哥都一直讚歎話好靚好靚…
真係好靚…
歡樂嘅時光過得特別快，
encore之後，大家都唔拾得俾草蜢哥哥走，
仲一直喺度嗌encore…
結果草蜢哥哥應二度encore，驚喜地再度現身，
原本已經刪曬嘅mic、樂器都重開，
草蜢哥哥應大眾要求唱咗
《永遠愛著您》結束演唱會。
不過大家都係意猶未盡居然三度encore，
嗌咗好耐好耐…
不過呢次草蜢哥哥冇再出嚟啦…
然後保安就出動，“勸”大家離開會場。
"...
♪
Music Walker ♪... ♪ Music Walker ♪... ♪ Music Walker ♪ ...”
後話：
其實影子唔係好記得草蜢哥哥係幾時開始行“妖艷”呢條路線，
不過佢哋真係好“妖”…
尤其係老么蔡一傑哥哥。
另外，影子一向唔認同“睇演唱會”係等於“追星”。
以影子嘅認知係：“追星”顧名思義即係無論偶像有乜嘢活動，
粉絲都會每一場或者幾乎每一場都跟住佢哋出現（就似追住佢哋跑）
呢啲先叫“追星”。
（當然，侵犯私隱嘅私生飯唔算追星）
睇演唱會對於影子嚟講係“欣賞一場表演”，
係親眼睇睇平時冇機會見到嘅名人，
親眼見證佢哋嘅舞台魅力。
而且最重要嘅一點係：每次都係影子欣賞嘅偶像嚟到影子位於嘅城市，
影子先有機會去睇… 影子冇咁嘅能力追住佢哋四圍走。
所以，唔好再話影子咁鬼老仲成日唸住追星，
影子從來冇追過星，OK？！
"...
♪
Music Walker ♪... ♪ Music Walker ♪... ♪ Music Walker ♪ ...”
而且，消遣、娛樂呢家嘢係冇分年齡嘅…
有自己欣賞明星、歌手、藝人並唔係令人羞恥嘅事，
佢哋可以令自己嘅生活多一啲色彩，
佢哋可以成為榜樣、動力，
佢哋可以令自己喺現實嘅社會、充滿壓力嘅生活裡面，
給自己一啲放縱、舒發壓力嘅機會，有乜問題？
點解要連呢啲機會都要剝削？
要用乜嘢方式生活由自己決定，
太在意人哋眼光其實係最大嘅壓力。
有啲人或者會覺得“偶像”、“娛樂”係無聊嘅…
到咗一定嘅年齡就唔可以再有鐘意嘅明星，
咁係因為你哋選擇嘅生活方式唔一樣，
唔代表其他人唔上進、唔代表其他人無聊。
就正如有啲人鐘意睇球賽，有自己鐘意嘅球隊、球員一樣。
各有所好，都好正常。
"...
♪
Music Walker ♪... ♪ Music Walker ♪... ♪ Music Walker ♪ ...”
講到呢度好似有啲離題…
其實影子最想表達嘅係：
“人生短短幾十年，生活應該由自己去揀…
唔係人哋點你就點，問問自己內心到底想唔想咁樣？
要開開心心過自己想要個“生活”？
定係隨波逐流好似行屍走肉咁“生存”？”
“FOLLOW YOUR HEART”
No comments:
Post a Comment